ЯҢАЛЫКЛАР

21нче гыйнварда Татарстан Республикасы Президенты М.Ш.Шәймиев министр урынбасары - РФ Эчке эшләр министрлыгының Иҗтимагый иминлек хезмәте җитәкчесе С.Ф.Щадрин белән очрашты.

Инде мәгълүм булганча, 18 гыйнварда "КамАЗ" - мастер" командасы "Телефоника-Дакар - 2004" раллиенда җиңүгә иреште. Бу уңайдан Татарстан Республикасы Президенты М.Ш.Шаймиев команда җитәкчесе С.Якуповка һәм "КамАЗ" ААҖгенераль директоры С.Когогинга котлау телеграммасы җибәрде. Анда республика җитәкчесе "КамАЗ-мастер" командасы әгъзаларын һәм камазлыларның барысын да дөньядагы иң абруйлы автоузышларның берсендә җинү белән котлый.

Бүген Казан Кремлендә Татарстан Президенты Минтимер Шәймиев Төркия Республикасының Казандагы яңа Генераль консулын кабул итте. Билгеле булганча, кырык өч яшьлек Исмаил Хаккы Муса әлеге вазыйфага агымдагы елның 8 гыйнварында билгеләнгән иде. Ул Казанда Төркия Генераль консуллыгы ачылганнан бирле дүртенче консул.

Кичә Татарстан Президенты М.Ш.Шәймиөв Татарстан Республикасының ике законына "Административ хокук бозулар турында Татарстан Республикасы Кодексына үзгәрешләр һәм өстәмәләр кертү турында" һәм "Мәгълүмати ресурслар һәм Татарстан Республикасын мәгьлүматлаштыру турында" кул куйды.

Татарстан Республикасы Президенты М.Ш.Шәймиев православие динендәге гражданнарыбызны Раштуа бәйрәме белән котлый.

30 декабрьдә Татарстан Президенты Минтимер Шаймиев Юдинода "Казан" локомотив депосы машинист-инструкторы Алексей Сорвин гаиләсен өй туе белән котлады. 1996 елның 1 гыйнварына Казанда гына да 5763 тузган йортта 32 меңгә якын гаилә яши иде. Сорвиннар тузган торакны бетерү буенча Президент программасы нигезендә квартира алган 29 меңенче гаилә. Шушы елда гына да Татарстанда өч мең ярым өй туе булды.

Хәерле кич, хөрмәтле ватандашлар! Бу минутларда 2003 нче ел республика тарихында һәм һәркемнең язмышында үз эзен калдырып, безнең белән хушлашып бара. Аның санаулы гына калган соңгы мизгелләрендә без, һәрвакыттагыча, туганнарыбыз һәм якыннарыбыз белән бергәләп бәйрәм табынына җыелабыз. Үткән елда эшләнгән яхшы эшләрне канәгатьләнеп искә алабыз, сөенечләр һәм үкенечләр, табышлар һәм югалтулар турында уйланабыз.

29 декабрьдә Татарстан Республикасы Президенты М.Ш. Шәймиев Башкортстан Республикасы Президенты Мортаза Гобәйдулла улы Рахимовның вазифага керешу тантанасында катнашты. Уфа аэропортында аны республика Премьер-министры урынбасары Ш.Х.Вахитов җитәкчелегендә Башкортстаның рәсми делегациясе каршы алды.

Татарстан Республикасы Президенты Минтимер Шәймиев исеменә "Татнефть" ААҖ генераль директоры, "Түбән Кама нефть эшкәртү заводы" ААҖнең Директорлар советы рәисе Шәфәгат Тәхаутдиновтан һәм "Түбән Кама нефть эшкәртү заводы" ААҖ генераль директоры Хәмзә Баһмановтан Бөтендөнья нефть эшкәртү компанияләре ассоциациясе карары белән Түбән Кама нефть эшкәртү заводына "2003 елда Россиянең һәм БДБ илләренең иң яхшы нефть эшкәртү заводы" дигән исем бирелү турында хат алынды.

Ниһаять, Түбән Кама синтетик майлар заводы сафка басты һәм продукция бирә башлады. Шул уңайдан заводның әзер продукция цехында үткәрелгән митингта чыгыш ясап, Татарстан Президенты Минтимер Шәймиев мондый уңышлы башкарылган эшнең фәкать "Татнефть" һәм Түбән Кама "Нефтехим" акционерлык җәмгыятьләре базасында гына мөмкин булуын ассызыклады.