ЯҢАЛЫКЛАР

19 мартта Казанның «Химиклар» мәдәният сараенда үткәрелгән эш урыннары гомумшәһәр ярминкәсенә эш эзләп килгәннәрдән 3820 кеше эш белешкән, нәтиҗәдә, шуларның 389ы эшкә урнашуга юллама алган.

ТР Дәүләт Советы утырышы барышында парламентның 13 кешедән торган президиумы сайланды. Анда спикер, аның урынбасарлары һәм Дәүләт Советы секретаре, депутатлар М.Сәлахов, Л.Малыхина, Р.Кантюков, Х.Миргалимов, Т.Водопьянова, И.Садриев, М.Гаделшин, В.Самилов, Р.Вәлиев керде.

19 мартта Казанда дүртенче чакырылыш ТР Дәүләт Советының беренче утырышында парламентта даими эшләүче комитетлар төзелде, аларның рәисләре, президиум әгъзалары сайланды.

19 мартта Казанда дүртенче чакырылыш ТР Дәүләт Советының беренче утырышында депутатлар парламент рәисе урынбасарлары итеп Александр Гусев һәм Римма Ратникованы, ТР Дәүләт Советы секретаре итеп Лилия Мавринаны сайлады.

18 мартта Татар дәүләт гуманитар-педагогика университетының Гыйльми советы утырышында ректор, профессор Рәдиф Җамалетдиновка тантаналы шартларда ЮНЕСКОның халыкара бүләге - алтын "Шәфкатьлелек" медале тапшырылды. Медальне иясенә тарих фәннәре докторы, профессор, Казан дәүләт финанс-икътисад институтының тарих, политология һәм хокук каферасы җитәкчесе, халыкара "Европа-Азия" академия президенты Энгель Таһиров җиткерде.

19 март көнне Казанда дүртенче чакырылыш ТР Дәүләт Советының беренче утырышы уза. Сессиядә Татарстан Республикасы Президенты Минтимер Шәймиев катнашты.

ТР буенча Эчке эшләр министрлыгының махсус подразделениеләре - милициянең махсус билгеләнешле отряды (ОМСН, ә 2002 елга кадәр - СОБР) белән милициянең аерым билгеләнешле отряды (ОМОН) бер махсус билгеләнешле үзәккә (ЦСН) берләштерелеп, анда быел 1 апрельдән 2010 елның 1 апреленә кадәр эксперимент үткәрелә.

18 мартта ТР Дәүләт Советының Кече залында Татарстан парламенты депутатлары вәкилләре киңәшмәсе уза. Көн тәртибенә чыгарылган мәсьәләләр Татарстан Республикасы Дәүләт Советының беренче утырышын оештыру, анда чыгарылган мәсьәләләр буенча тәкъдимнәр, парламентның беренче утырышы эше тәртибе буенча тәкъдимнәр белән бәйле.

Түбән Камада февральдә нефть эшкәртү һәм нефть химиясе комплексының төзелеш мәйданында 1,4 миллиард сумлык монтажлау эшләре башкарылган.

Тиздән Татарстанда үрнәк итеп куярлык терлекчелек фермалары барлыкка киләчәк. Фермаларда терлекләрнең баш саны 10нан артып китәчәк. Бу хакта “Татар–информ” агентлыгына Татарстанның Фермерлар һәм крестьян хуҗалыклары ассоциациясе рәисе Камияр Байтимеров хәбәр итте.