ЯҢАЛЫКЛАР

19 май көнне ТР Премьер-министры Рөстәм Миңнеханов Казандагы 7 нче шифаханәнең ремонт һәм реставрацияләнгән бинасын карады. Ремонт эшләренең сыйфатын бәяләүдә ТР сәламәтлек саклау министры Айрат Фәррахов, Казан мэры Илсур Метшин һ.б. катнашты.

ТР Дәүләт Советы спикеры Фәрит Мөхәммәтшинның 19 май - Татарстан матбугат көне уңаеннан журналистлар белән очрашып сөйләшүе матур традициягә әйләнде. Бүген дә парламент башлыгы, Татарстан массакүләм мәгълүмат чаралары медиафорумы кысаларында, республика җитәкчелеге һәм Дәүләт Советы исеменнән каләм осталарын һөнәри бәйрәмнәре белән котлады.

Казанда хоккей сезоны инде бер ай элек тәмамланды дип уйлаучылар ялгыша. Тамашачыларны иң зур чара әле алда көтә. Бу җомгада, ягъни 22 майда башкалада Гагарин Кубогының беренче хуҗалары, Россия чемпионнары- "Ак Барс"ны бүләкләү хөрмәтенә хоккей бәйрәме гөрләячәк.

Татарстан Президенты "Татарстан Республикасы Матбугат һәм массакүләм коммуникацияләр "Татмедиа" агентлыгы турында"гы Указга (№ ПУ-278 от 15.05.2009) кул куйды.

Татарстан республикасының РФдагы Тулы вәкаләтле вәкиле Назиф Мириханов Татар мәдәният үзәгендә узган Мәскәү татар морзалары мәҗлесе хисап-сайлау җыелышында катнашты.

Быел 3-5 июнь көннәрендә Казанда IX Нәүрүз халыкара төрки халыклар театры фестивале булачак. Шул уңайдан 20 май көнне сәгать 10.00да Г.Камал исемендәге Татар дәүләт академия театрының Кече залында матбугат конференциясе үткәрелә.

Быелгы фестивальнең 17 ел эчендә узган иң яхшы фестиваль булды. Киләсе "Студентлар язын" кабул итүче шәһәргә Казандагы оештыру дәрәҗәсеннән түбән төшмәс өчен шактый эшләргә туры киләчәк.

Казанда 5 көн гөрләгән студентлар бәйрәме ахырына якынлаша. Бүген кичке сәгать 7 дә "Пирамида"да "Россия студентлар язы-2009" фестиваленең йомгаклау гала-концерты башлана. Ә аңа кадәр "Уникс"та 17 нче Бөтенроссия фестиваленең конкурс программасына йомгак ясалды.

18 май көнне ТР Дәүләт Советында спикер Фәрит Мөхәммәтшин "Ачык ишекләр көне"ндә катнашучы "Татарстан - яңа гасыр" телерадиокомпаниясе хезмәткәрләре белән очрашты. Аңа кадәр "яңагасырлылар" комитетларда булып, чәй өстәле янында депутатлар белән әңгәмә корды. Шунысын билгеләп үтәргә кирәк: парламентта иҗтимагый оешмалар, студентлар, киң җәмәгатьчелек өчен мондый очрашулар оештырылып тора.

Казан шәһәрен халыкара аренада ничек танытырга, башкалага туристларны ничек итеп җәлеп итәргә? 18 май көнне бу хакта Казан мэриясендә узган "эшлекле дүшәмбе" киңәшмәсендә фикер алыштылар.