ЯҢАЛЫКЛАР

10 декабрьдә Татарстан Президенты Минтимер Шәймиев Казан Кремлендә киңәшмә үткәрде, анда башкаланың генераль үсеш планы турында фикер алышынды.

9 декабрьдә Киров өлкәсенең Нократ Аланы шәһәре янында Нократ елгасы аша күпер ачу тантанасы булды. Әлеге чарада РФ Хөкүмәте Рәисенең беренче урынбасары Сергей Иванов, РФ Президентының Идел буе федераль округындагы тулы вәкаләтле вәкиле Александр Коновалов, ТР Президенты Минтимер Шәймиев һәм Киров өлкәсе губернаторы Николай Шаклеин катнашты.

7 декабрь көнне Мәскәүдә "Бердәм Россия" Бөтенроссия сәяси партиясе Югары советы бюросы утырышы узды. Бюро утырышында бишенче чакырылыш РФ Дәүләт Думасы депутатларын сайлау кампаниясе, төбәкләрдәге сайлау кампанияләре нәтиҗәләре, шулай ук "Бердәм Россия" партиясе VIII съездының икенче өлешен үткәрү хакындагы мәсьәлә каралды. Утырышта "Бердәм Россия" партиясе Югары советы рәистәше Минтимер Шәймиев дә катнашты.

Татарстан Республикасы Президенты Минтимер Шәймиев исеменә Россиянең техник җайга салу һәм метрология буенча Федераль агентлыгы җитәкчесе Григорий Элькиннан котлау телеграммасы килде. Билгеле булганча, 2007 елда 10нчы Бөтенроссия "Россиянең иң яхшы 100 тауары" конкурсы нәтиҗәләре буенча Россия Федерациясе субъектлары арасында Татарстан Республикасы беренче урын алды.

6 декабрьдә Татарстан Республикасы Дәүләт Советының өченче чакырылыштагы утыз дүртенче утырышы узды. Утырышта ТР Президенты Минтимер Шәймиев, ТР Премьер-министры Рөстәм Миңнеханов, ТР Конституция һәм Арбитраж судлары, ТР Хисап палатасы, ТР Үзәк сайлау комиссиясе, ТР Иҗтимагый палатасы вәкилләре катнашты.

ТР Президенты Минтимер Шәймиев исеменә "Спортивная Россия" Бөтенроссия ирекле җәмгыяте Үзәк советы рәисе, өч тапкыр олимпия чемпионы Ирина Роднинадан хат килде. Хатта 27 ноябрьдән 1 декабрьгә кадәр Бөтенроссия хоккей көне кысаларында балалар арасында II Халыкара "Алтын алка" турниры узуы, анда Молдова, Латвия, Казакъстан, Украина, Беларусь һәм Россиядән командалар катнашуы хакында сүз бара. 1 декабрь көнне "Вымпел" (Беларусь Республикасы) һәм "Юность" (Россия, Татарстан Республикасы, Чаллы) командалары арасында турнирның финалы узды, анда "Юность" командасы "Вымпел"ны 4:3 исәбенә җиңде.

4 декабрь көнне Казанда "КАМАЗ" ачык акционерлык җәмгыяте белән Алманиянең "Кнорр-Бремзе" компаниясе арасында уртак предприятие төзү турындагы килешүгә кул куелды. "КАМАЗ"ның Татарстан башкаласындагы вәкиллегендә шушы уңайдан узган киңәшмәдә Татарстан Президенты Минтимер Шәймиев тә катнашты.

4 декабрьдә "Казан Ярминкәсе"нең күргәзмә үзәгендә "Энергоресурслар нәтиҗәлелеге һәм энергияне саклап калу - 2007" VIII Халыкара симпозиум һәм "Энергетика. Ресурслар сакланышы - 2007" IX Халыкара күргәзмә үз эшен башлап җибәрде. Ачылыш тантанасында Татарстан Президенты Минтимер Шәймиев катнашты.

2 декабрьдә Россия Дәүләт Думасына узган сайлауларда татарстанлыларның 85,4 проценты катнашкан. Бу хакта 3 декабрьдә Татарстан Президенты, "Бердәм Россия" Бөтенроссия сәяси партиясе Югары Советы рәистәше Минтимер Шәймиев Казан Кремлендә узган матбугат очрашуында хәбәр итте. Республиканың гаммәви мәгълүмат чаралары вәкилләрен ТР Президенты үткән сайлаулар нәтиҗәләре белән таныштырды.

2 декабрь көнне Россиядә Дәүләт Думасына сайлаулар узды. Иртәнге сәгать уннар тулып киткәч, Казандагы 59-нчы сайлау участогына Татарстан Президенты да килде. Гадәттәгечә, тавыш бирергә Минтимер Шәймиев тормыш иптәше Сәкинә ханым белән бергә килгән иде. Мәктәп ишегалдында аларны Казан мэры Илсур Метшин каршы алды.