ЯҢАЛЫКЛАР

23 апрельдә Татарстан Президенты Минтимер Шәймиев Наина Иосифовна Ельцинага телеграмма җибәрде, анда ул Татарстан халкы һәм шәхсән үз исеменнән аның ире Борис Николаевич Ельцин вафат булуына бәйле рәвештә, тирән кайгы уртаклашуны белдергән.

Татарстан Президенты Минтимер Шәймиев март аенда Россия субъектлары җитәкчеләре исемлегендә үзәк гаммәви мәгълүмат чараларында хәбәрләр саны буенча 10нчы урын һәм үзәк ГМЧ хәбәрләренә нигезләнеп исәпләнгән уңай яктан телгә алыну индексы буенча 9нчы урын алган. Бу турыда "Regnum" мәгълүмат агентлыгы "Медиалогия" компаниясе белән берлектә әзерләгән рейтингтан билгеле булды.

Татарстанда белем алучы 300 меңгә якын студентның 2013 елда Казанның Универсиада хуҗабикәсенә әверелүенә йогынтысы көчле булырга мөмкин. 21 апрельдә Татарстан Республикасы Президенты Минтимер Шәймиев Казан Кремлендә, Халыкара студентлар спорт берлеге Президенты Джордж Киллиан белән очрашуда, республика студентларының зур байлык булуын ассызыклады.

20 апрельдә Казан Ратушасында Татарстан Президенты Минтимер Шәймиев, РФ Хөкүмәт Аппараты җитәкчесе - РФ Хөкүмәте Рәисе урынбасары Сергей Нарышкин һәм ИФОда Россия Президентының Тулы вәкаләтле вәкиле Александр Коновалов "Административ реформа: федераль тәҗрибә һәм Россия Федерациясе субъектларында гамәлгә ашырылу үзенчәлекләре" темасына "түгәрәк өстәл" утырышын ачып җибәрделәр.

Дөньяның 30га якын иленнән студент спорты федерацияләре җитәкчеләре Казанга җыелды. Бүген 20 апрель көнне Татарстан башкаласында алар катнашында БДБ һәм Көнчыгыш Ауропа илләренең студент спорты проблемаларына багышланган Халыкара фәнни-гамәли семинар ачылды. Әлеге Халыкара масштабтагы чараны Казанда уздыру карары гыйнвар аенда Италиянең Турин шәһәрендә кабул ителгән иде.

19 апрельдә Татарстан Президенты Минтимер Шәймиев һәм Бөтендөнья Банкының Россия буенча директоры - Бөтендөнья Банкының Мәскәүдәге даими вәкиле Клаус Ролланд Казанда "Корстон" кунакханә-сәүдә-күңел ачу комплексында, "Татарстанның тотрыклы үсеше өчен инновацияләр" исемле инновация үсеше проектлары ярминкәсен ачып җибәрде.

18 апрель көнне Казан Кремлендә Татарстан Президенты Минтимер Шәймиев “Труд” гәзите баш мөхәррире Валерий Симонов белән очрашты. Баш мөхәррир Минтимер Шәймиевне “Труд” каһарманы” исеменә лаек булуы белән тәбрикләде.

Татарстан Президенты Минтимер Шәймиев исеменә Россия Федерациясе Пенсия фонды идарәсе рәисе Геннадий Батанов исеменнән хат килде. Анда "РФ Пенсия фонды идарәсенең 2007 елның 20 март 60нчы номерлы карары нигезендә, Айрат Шәфигуллин җитәкләгән Россия пенсия фондының ТР бүлегенә "2006 ел өчен Идел буе федераль округының иң яхшы Россия пенсия фонды бүлеге" исеме бирелде" диелгән.

СССРның спорт остасы, Таҗикстанның биш тапкыр, Урта Азия бәйгеләренең ике тапкыр, авыл спортчылары арасында СССР һәм Россия чемпионы, грек-рим көрәше буенча Душәнбедә уздырылган Халыкара турнир җиңүчесе, Россиянең һәм Татарстанның атказанган тренеры Мәгас Мөбәракша улы Сәхәбетдинов Татарстан Президенты Минтимер Шәймиевнең Рәхмәт хатына лаек.

13 апрельдә Татарстан Республикасы Президенты Минтимер Шәймиев "Республика Татарстан" газетасы редакциясе хезмәткәрләрен басманың 90 еллык юбилее белән тәбрикләде. Илбашы шулай ук туры телефон элемтәсе аша газеты укучыларының сорауларына да җавап бирде.