ЯҢАЛЫКЛАР

28 октябрьдә Татарстан Дәүләт Советы сессиясе утырышында “РФ һәм ТР дәүләт хакимияте органнары арасында вәкаләтләр чикләрен билгеләү һәм үзара вәкаләтләр бүлешү” турында Шартнамәнең яңа проекты күпчелек тавыш белән хупланды.

26 октябрьдә Татарстан Президенты Минтимер Шәймиев Казакъстан Республикасына рәсми сәфәр белән китте. Сәфәр программасында КР Президенты Нурсолтан Назарбаев, Казакъстан Республикасы Парламенты Мажилиса депутатлары белән очрашу планлаштырылган.

24 октябрьдә Татарстан Президенты Минтимер Шәймиев башкала ратушасында Казан шәһәренең яңа оештырылган муниципаль берлеге вәкиллекле органы утырышында катнашты. Тавыш бирү һәм муниципалитетның вәкиллекле органына җитәкче сайлангач, ТР Президенты депутатлар алдында чыгыш ясады. «Җирле үзидарә органнарына сайлаулардан соң, республика үзенең үсешендә яңа сәяси этап башлый», - дип билгеләп үтте ул.

21 октябрьдә Казан Кремлендә Татарстан Президенты Минтимер Шәймиев Казанның архитектур йөзен камилләштерү мәсьәләләренә багышланган киңәшмә уздырды. Аның эшендә ТР Премьер-министры Рөстәм Миңнеханов, беренче вице-премьер Равил Моратов, төзелеш, архитектура һәм торак-коммуналь хуҗалык министры Марат Хөснуллин, Казан хакимияте башлыгы Камил Исхаков, архитектура-проектлау оешмалары, архитектура остаханәләре җитәкчеләре катнашты.

Татарстан Президенты Минтимер Шәймиев Казакъстан һәм Россия мөнәсәбәтләрен үстерүгә юнәлдерелгән тынычлык һәм дуслыкны ныгытуда, халыклар арасында үзара ышаныч тудыруда зур өлеш кертүдә актив эшчәнлеге өчен Казакъстан Республикасы Президентының 2005 елгы Дәүләт дуслык һәм прогресс премиясенә лаек булган, дип хәбәр итә Казакъстан Президентының матбугат хезмәте.

17 октябрьдә Казанга РФ Социаль иминият фонды рәисе Галина Карелова килде. “Казан” аэропортында аны ТР Премьер-министрының беренче урынбасары – икътисад һәм сәнәгать министры Борис Павлов һәм РФ Социаль иминият фондының ТР буенча төбәк бүлеге идарәчесе Рәшит Галимов каршы алды.

16 нчы октябрь көнне без сезнең белән барлык җирле үзидарә органнарына депутатлар сайлаячакбыз. Республика тарихында беренче мәртәбә җирле хакимият халыкның үз кулына бирелә. Без сәяси тормышта яңа чорга аяк басабыз.

Татарстан Президенты Минтимер Шәймиев һәм РФ Пенсия фонды Идарәсе Рәисе Геннадий Батанов Россия Пенсия фондының ТР буенча бүлегенең административ бинасын ачу тантанасында катнашты.
Яңа бинаны ачу тантанасында чыгыш ясаганда, Минтимер Шәймиев аны намуслы хезмәтләре белән үзләрен пенсия акчалары белән тәэмин иткән һәм пенсия яшенә җиткән кешеләргә хөрмәт билгесе дип атады.

13 октябрьдә Казан Кремлендә Татарстан Президенты Минтимер Шәймиев РФ Пенсия фонды Идарәсе Рәисе Геннадий Батанов белән очрашты. Г.Батанов Казанга РФ Пенсия фондының ТР буенча бүлегенең яңа административ бинасын ачу тантанасына килгән иде.

7 октябрьдә башкаланың “Баскет-холл”ында Авыл хуҗалыгы һәм эшкәртү сәнәгате хезмәтчәннәре көненә багышланган тантаналар узды. ТР Президенты Минтимер Шәймиев шушы уңайдан Казанга җыелган Татарстан агросәнәгать комплексының биш меңнән артык вәкилен котлады. Уңыш бәйрәмендә шулай ук РФ Хисап палатасы Рәисе Сергей Степашин, республиканың министрлык һәм ведомство җитәкчеләре, ТР Президенты Аппаратының җаваплы хезмәткәрләре катнашты.